Austria, pro përshpejtimit të integrimit të Ballkanit në BE

sami-ullah-unsplash

Në maj të vitit 2022, ministri austriak për Punë të Jashtme, Alexander Schallenberg, dhe ministrja austriake për Çështjet Evropiane, Karoline Edtstadler, paraqitën propozime për integrim gradual në mënyrë që të ndryshojnë dinamikën e ngecjeve në procesin e zgjerimit.

Duke u mbështetur në këtë, ministrat federalë tani synojnë të avancojnë më tej këto propozime dhe të identifikojnë fusha konkrete të politikave në mënyrë që të përshpejtojnë integrimin e Ballkanit Perëndimor, njofton ambasada e Austrisë në Kosovë, transmeton albinfo.ch.

“Tani duhet të japim një shembull për Ballkanin Perëndimor dhe të shtyjmë përpara zgjerimin. Duhen hapa të prekshëm dhe një sistem i ndjeshëm nxitës për reforma, në të kundërtën do të humbasim njerëzit në rajon. Me propozimet tona më të shtrira për integrimi gradual, synojmë t’i afrojmë vendet e Ballkanit Perëndimor drejt BE-së si institucionalisht, ashtu edhe financiarisht dhe në fusha konkrete të politikave. Nuk ka më kohë për të humbur. Realiteti gjeopolitik kërkon shpejtësi dhe qasje inovative”, tha ministrja për Evropë, Karoline Edtstadler.

“Zgjerimi është instrumenti më i fortë gjeostrategjik që Bashkimi Evropian ka në dispozicion. Le ta përdorim si të tillë. Nuk mund të pritet deri sa vendet kandidate të zbatojnë çdo pikë e presje e acquis, le t‘i integrojmë vendet kandidate më herët në ato fusha të politikave, ku është e mundur. Me gjithë përqendrimin e arsyeshëm në Lindje, ne nuk duhet të gabojmë dhe ta harrojmë Evropën Juglindore. Austria mbetet një mbështetëse e vendosur për një integrim të përshpejtuar dhe gradual të Ballkanit Perëndimor”, theksoi ministri për Punë të Jashtme, Alexander Schallenberg.