Kosova në shkurt mëson kundërshtarët për Ligën e Kombeve

Foto: FFK

Më 8 shkurt përcaktohen kundërshtarët e ardhshëm të përfaqësueses së Kosovës në edicionin e katërt të Ligës së Kombeve të UEFA-s, shorti i së cilës garë tërhiqet në Paris.

Ndeshjet e fazës grupore të Ligës së Kombeve do të zhvillohen në vjeshtën e këtij viti.

Ndeshjet e para janë prej 5 deri më 7 shtator e të dytat prej 8 deri më 10 shtator. Dy ndeshje janë në tetor e dy të tjera në nëntor.

Përfaqësuesja e Kosovës do të vazhdojë të luajë në Ligën C të Ligës së Kombeve dhe për short do të jetë në vazon e dytë së bashku me Azerbajxhanin, Bullgarinë e Ishujt Faroe.

Rumania, Suedia, Armenia e Luksemburgu janë në vazon e parë. Maqedonia e Veriut, Sllovakia, Irlanda e Veriut dhe Qipro në vazon e tretë, ndërsa Bjellorusia, Estonia, Letonia dhe Lituania apo Gjibraltari në vazon e katërt.

UEFA ka bërë disa ndryshime për edicionin e katërt të Ligës së Kombeve. Ka përfshirë fazë çerekfinale për Ligën A. Sa i takon Ligës C, katër fituesit e grupeve promovohen në Ligën B. Ndërkohë vetëm dy prej katër përfaqësueseve më të dobëta në grupe në Ligën C, bien në Ligën D. Dy të tjerat luajnë në plejaut.

FFK-ja ende nuk e ka caktuar selektorin e ri të Kosovës. Ndërkohë në mars e në qershor Kosova pritet të luajë ndeshje miqësore./Koha.net