BE-ja do të rrisë koston për marrjen e një vize Shengen

Tarifa për marrjen e një vize Shengen duket se do të rritet me 12 për qind nëse Komisioni Evropian vijon qëndrimet e tij, përcjell albinfo.ch.

Komisioni ka propozuar ngritjen e tarifës bazë për vizën Shengen nga 80 në 90 euro për të rriturit dhe nga 40 në 45 euro për fëmijët.

Vizat Shengen mund të merren nga shtetas jo-BE nga vende që nuk përfitojnë nga rregulli 90-ditor i BE-së/zonës Shengen, si për shembull shtetas të Afrikës së Jugut, Indisë, Pakistanit, Sri Lankës dhe Kinës.

BE-ja po propozon gjithashtu rritjen e tarifës edhe më të lartë për ato vende që mendohet se nuk janë bashkëpunuese me marrjen e qytetarëve të dëbuar nga shtetet anëtare.

Pra, nëse Këshilli i BE-së, i cili përbëhet nga qeveritë e BE-së, vendos se ka “bashkëpunim të pamjaftueshëm për ripranimin” e qytetarëve të dëbuar me një vend të tretë, tarifa e vizës Shengen për qytetarët nga ai vend do të rritet nga 120 €/160 € në 135 € / 180 €.

Për më tepër, rishikimi i tarifave të vizave ndikon në shumën maksimale që mund të ngarkojnë ofruesit e jashtëm të shërbimeve që mbledhin aplikime për viza në emër të shteteve anëtare, e cila zakonisht vendoset deri në gjysmën e tarifës standarde.

Kjo tarifë do të rritet nga 40 euro në 45 euro.

Tarifa për zgjatjen e vizës Shengen do të mbetet në 30 euro.

Rishikohet çdo tre vjet

Çdo tre vjet, Komisioni i BE-së ka për detyrë të vlerësojë nëse nevojiten tarifa të reja, duke marrë parasysh “kriteret objektive”, si norma e inflacionit të BE-së dhe mesatarja e pagave të nëpunësve civilë në vendet anëtare të BE-së.

Komisioni publikoi propozimin e tij më 2 shkurt, pas një takimi me ekspertë nga vendet anëtare të BE-së në dhjetor, kur një “shumicë dërrmuese” mbështeti rishikimin.

Propozimi tani është i hapur për konsultim deri më 1 mars. Komisioni mund të miratojë më pas rregulloren, e cila do të hyjë në fuqi 20 ditë pas publikimit të saj në Gazetën Zyrtare të Bashkimit Evropian.

Komisioni thotë se edhe me rritjen, tarifat e vizave për zonën Shengen janë “ende relativisht të ulëta” krahasuar me vendet e tjera. Për shembull, një vizë për në SHBA kushton 185 €, ose 172 €; për Mbretërinë e Bashkuar fillon nga 115 £ (134 €); për Kanadanë është 100 dollarë plus 85 dollarë për biometrikë, ose 130 €; për Australinë 190 dollarë, ekuivalenti me 117 €.

 

Vizë vetëm dixhitale

BE po planifikon gjithashtu të prezantojë një vizë Shengen vetëm dixhitale. Kjo do të lejojë aplikimin online, pavarësisht nga vendi i Shengenit që aplikantët synojnë të vizitojnë, dhe do të zëvendësojë ngjitësin aktual në pasaporta me një vizë dixhitale.

Sipas faqes së internetit të Komisionit Evropian, platforma dixhitale do të fillojë të funksionojë në vitin 2028.

 

Kush ka nevojë për vizë Shengen

Viza Shengen lejon qëndrimin për turizëm ose vizita familjare (por jo për punë) në 28 vende evropiane deri në 90 ditë në çdo periudhë 6-mujore. Personat që udhëtojnë për udhëtime pune, konferenca ose takime aplikojnë për një vizë biznesi Shengen.

Kushdo që dëshiron të qëndrojë më gjatë ose të punojë, ka nevojë për vizë nga vendi që synon të vizitojë.

Viza Shengen kërkohet për qytetarët e vendeve që nuk përfitojnë nga ‘rregulli 90-ditor’, si shtetasit e Afrikës së Jugut, Indisë, Pakistanit, Sri Lankës dhe Kinës.

Nuk është e nevojshme për shtetasit e tjerë jashtë BE-së si britanikët, amerikanët, kanadezët ose australianë të cilët mund të kalojnë deri në 90 ditë në çdo 180 në zonën Shengen pa pasur nevojë për vizë. Këtu mund të shihni listën e plotë të vendeve që kanë nevojë për vizë.

Vendet e Shengenit përfshijnë shtetet anëtare të BE-së, duke përjashtuar Irlandën (e cila u largua), Qipron dhe Bullgarinë dhe Rumaninë për kufijtë tokësorë. Islanda, Norvegjia, Lihtenshtajni dhe Zvicra nuk janë anëtarë të BE-së, por gjithashtu i janë bashkuar Konventës së Shengenit.

 

---