Forcimi i frangut ka prekur edhe vendet e Ballkanit

Forcimi i frangut zviceran ka sjellë panik edhe në Maqedoni, Serbi dhe Kroaci

Bankat në Shkup kanë bërë thirrje se forcimi i vlerës së frangut zviceran karshi euros nuk ndikon te qytetarët e Maqedonisë.

Në këtë situatë mund të përfitojnë vetëm qytetarët që kanë të kursyer franga dhe kanë vendosur t’i konvertojnë në euro apo në ndonjë valutë tjetër të huaj. Kreditë që janë dhënë në Maqedoni janë në euro, thonë në „Stopanska Banka“ në Shkup.

Më së shumti janë goditur këmbimoret në Maqedoni me vendimin e Bankës Nacionale të Zvicrës që të heqë kufizimet karshi euros, raportojnë mediat në Shkup. Gjatë të enjtes shumica prej tyre nuk kanë qenë në gjendje as të shesin, e as të blejnë franga zvicerane.

Gjatë ditës në Maqedoni frangu ka levizur deri 72 denar pastaj është stabilizuar me 62 denar. Si duket më së shumti i ka trazuar rritja e vlerës së frangut qytetarët në Serbi dhe Kroaci. Me këtë vendim janë goditur rreth 20 mijë qytetar, të cilët kanë kredi.

Gjendje e njëjtë është edhe në Kroaci. Bankat e atjeshme kanë kërkuar nga qytetarët  të konvertojnë kreditë në euro ngase mund të dëmtohen shumë nga rritja e vlerës së frangut karshi euros.