Zvicra, Gjermania dhe Bullgaria, lejojnë hyrje-daljet me pasaportat me emrin e vjetër, “Republika e Maqedonisë”

Keystone EPA/GEORGI LICOVSKI

Vendet anëtare të Bashkimit Evropian dhe zonës Shengen, si Zvicra, Gjermania dhe Bullgaria po lejojnë hyrjen dhe daljen në vendkalimet e tyre kufitare me pasaportë me emrin e vjetër kushtetues, “Republika e Maqedonisë”, transmeton albinfo.ch.

Sipas raportimeve nga mediat maqedonase, shembulli i këtyre vendeve nuk përjashtohet të ndiqet edhe nga vendet e tjera të Evropës, pasi në këto vende ka një diasporë të madhe nga Maqedonia e Veriut, e cila është e angazhuar në mënyrë të përhershme me punë, kështu që shtetet nuk duan të rrezikojnë ekonominë vendase, duke pasur parasysh problemet me ndërrimin e dokumenteve të udhëtimit të qytetarëve të Maqedonisë sipas afateve të Marrëveshjës së Prespës.

Nga vendet e rajonit mund të udhëtoni drejt Shqipërisë dhe Kosovës me pasaportë të vjetër, teksa sipas raportimeve nga “360 gradë”, të cilat citojnë burimet e tyre, nuk duhet pritur njoftim zyrtar për vendime të tilla nga këto vende pasi nuk do të donin të viheshin në një pozitë të pakëndshme përballë Greqisë.

Ndryshe, ministri i Punëve të Jashtme të Maqedonisë së Veriut, Bujar Osmani para disa ditëve gjatë vizitës së tij në Bernë, ka konfirmuar se Zvicra vazhdon të njohë pasaportat e vjetra.