Festë për pavarësinë e Kosovës në Amriswil

Salla e madhe në Pentorama ishte e mbushur me bashkatdhetarë nga e gjithë Zvicra gjermane, që kishin ardhur për të festuar Ditën e Pavarësisë

Tri shoqëritë shqiptare, shoqata “Sharri”, shoqëria “Dardania” dhe ansambli “Drita” festuan së bashku festën e pavarësisë së Kosovës në Amriswil.

Salla e madhe në Pentorama ishte e mbushur me bashkatdhetarë që kishin ardhur nga të gjitha anët e Zvicrës gjermane, për ta festuar përvjetorin e 16-të të pavarësisë.

Kryetari i shoqatës “Sharri” në Waldkirch të St. Gallenit, Nagip Memeti, i uroi gjithë shoqatës dhe mbarë popullit shqiptar pavarësinë e Kosovës. Ndërsa kryetari i Shoqërisë Kulturore e Artistike “Dardania” nga Winterthuri, Shefqet Cakolli, përshëndeti të gjithë të pranishmit dhe u uroi festën e 17 Shkurtit, si festën më sublime pas festës së Pavarësisë së Shqipërisë, me çka tha se kjo festë bashkon shqiptarët gjithandej.

Edhe kryetari i ansamblit “Drita”, Hajredin Gashi, me një fjalë rasti përshëndeti të pranishmit, duke u uruar gjithë shqiptarëve këtë ditë të madhe të kombit . Natyrisht se nuk munguan as këngët, vallet dhe recitimet kushtuar Kosovës dhe heronjve kombëtarë.

 

 

---