Taravari thërret debat me kandidatët për president për migrimin e të rinjve

Kandidati shqiptar i opozitës për president të Maqedonisë së Veriut, Arben Taravari, ka njoftuar për të shtunën një debat publik, ku sipas tij, në fokus do të jetë migrimi i të rinjve si një nga çështjet më alarmante me të cilën po përballet vendi.

Në këtë debat ai i ftoi të marrin pjesë edhe kandidatët për president, përcjell albinfo.ch.

“Programi im do të bazohet në atë se çfarë kërkojnë qytetarët, dëgjoj se qytetarët kërkojnë nga ne probleme bazë, ku ka problem më të madh se migrimi i të rinjve, në 10 vjetët e fundit kanë ikur afro 800 mijë qytetarë, andaj planifikojmë të shtunën të organizojmë një debat me të gjithë kandidatët për president që të debatojmë në këtë temë”, deklaroi Taravari. Ai tutje bëri të ditur se debati mbahet të shtunën, në ora 12:00 në Tetovë.