Së shpejti hekurudha Prishtinë-Tiranë

Qeveria e Kosovës dhe ajo e Shqipërisë po e shqyrtojnë mundësinë për ndërtimin linjës hekurudhore Prishtinë-Tiranë

Pas përfundimit të projektit më të madh ndërshtetëror, autostradës “Rruga e Kombit”, dy shtetet, Kosova dhe Shqipëria po e shqyrtojnë mundësinë për ndërtimin linjës hekurudhore Prishtinë-Tiranë. Për këtë projekt së shpejti pritet të bëhet studimi i fizibilitetit.

Kështu u tha pas një takimi që zhvilluan në Prishtinë, ministri i Transportit dhe Infrastrukturës së Kosovës, Lutfi Zharku dhe ministri i Infrastrukturës së Shqipërisë, Edmond Haxhinasto. Po ashtu në këtë takim u shqyrtua vendimi i qeverisë shqiptare që “Rruga e Kombit” në pjesën shqiptare të jepet me koncesion.

“Shprehëm gatishmërinë tonë dhe interesimin e jashtëzakonshëm për lidhjen me një vijë hekurudhore mes Kosovës dhe Shqipërisë. Natyrisht pjesa jonë është vetëm 17 kilometra dhe që pjesa më e madhe e punës i mbetet qeverisë shqiptare, por që jemi të gatshëm të gjejmë mekanizma për financim dhe të fillojmë me studimin e fizibilitetit nga të dyja qeveritë”, tha ai.

Lidhur me “Rrugën e Kombit”, ministri Zharku, tha se është biseduar për mënyrën e menaxhimit dhe të operimit në rrugën e kombit pas paralajmërimeve për koncensionimin në pjesën shqiptare.

Edhe ministri Haxhinasto, tha se në takim është rikonfirmuar vullneti për të ecur me shpejtësi në mënyrë konkrete në zbatimin e marrëveshjes mes dy qeverive.

Ai po ashtu tha se tema kryesore e takimit ishte “Rruga e Kombit” që kërkon koordinim dhe shërbim nga të dyja palët. “Jemi në fazën e rivlerësimit, kemi rënë dakord që ekspertët tanë të përgatisin së shpejti një paketë të posaçme për t’i shërbyer biznesit të Kosovës në portet e Shqipërisë, me qëllim që ta lehtësojmë atë sa më shumë”, tha ai.

Ndërsa ministri i Transportit dhe Infrastrukturës së Kosovës, Lutfi Zharku gjithashtu theksoi se janë në fazën fillestare për vazhdimin e “Rrugës së Kombit” nga Prishtina për Gjilan e deri në Dheun e Bardhë.