Maqedoni: Sot dorëzohen listat për deputetë

Koalicionet dhe partitë politike më së voni deri në mesnatë (2 prill) duhet të dorëzojnë listat për deputetë pranë Komisionit Shtetëror Zgjedhor (KSHZ) për zgjedhjet parlamentare të 8 majit, përcjell albinfo.ch.

KSHZ sot duhet të konfirmojë edhe listën zgjedhore për zgjedhjet presidenciale të 24 prillit, por edhe për parlamentarët. KSHZ në një afat prej 24 orëve bën verifikimin e listave për deputetë, nëse ka lëshime apo parregullësi. Renditja e listave të kandidatëve të partive dhe koalicioneve do të bëhet me short të hedhur në KSHZ më së voni deri më 13 prill dhe ai numër do të jetë i njëjtë për të gjitha njësitë zgjedhore. Me ndryshimet e Ligjit zgjedhor, partitë dhe koalicionet që kanë kandidat për president mund t’i mbajnë numrat e njëjtë që i kanë te lista e kandidatëve për kryetar shteti.

Fushata zgjedhore për zgjedhjet parlamentare do të fillojë më 18 prill dhe se disa ditë do të zhvillohet bashkë me fushatën për zgjedhjet presidenciale. Fushata presidenciale fillon më 4 prill dhe përfundon më 22 prill, ndërsa më 24 prill është dita e votimit.