Voton Talat Xhaferi: Sot zgjedhim në cilin drejtim do të lëvizë vendi ynë

Kryeministri i Maqedonisë së Veriut, Talat Xhaferi, ka votuar në zgjedhjet presidenciale që po mbahen në Maqedoninë e Veriut. Ai ka reaguar pas votimit përmes një postimi në rrjetet sociale, duke e konsideruar një ditë të veçantë, përcjell albinfo.ch.

Ndër të tjera, Xhaferi ka ftuar të gjithë qytetarët të votojnë dhe të vendosin se në cilin drejtim do të lëvizë vendi.

“Sot është ditë e veçantë. Si qytetar, e përmbusha të drejtën time qytetare, kushtetuese dhe ligjore të votoj fshehtas në zgjedhje të lira, korrekte dhe demokratike. I ftoj të gjithë qytetarët të përmbushin të drejtën e vet në votim dhe të vendosin për ardhmërinë tonë evropiane.

Në zgjedhje nuk vendosim vetëm për atë se kush do të jetë në pushtet viteve të ardhshme, por në cilin drejtim do të lëvizë vendi ynë.

Si Kryeministër, shpreh kënaqësi që deri tani votimi rrjedh pa probleme dhe shpresoj se procesi i përgjithshëm zgjedhor do të rrjedhë qetë”, ka shkruar Xhaferi.

Nga ana tjeter, kandidat për president nga Fronti Evropian, Bujar Osmani, ka votuar në shkollën fillore “Adem Jashari” në komunën e Çairit në Shkup.

Ai ka inkurajuar qytetarët që të dalin sa më shumë në votime dhe të shprehin bindjen e tyre.

Gjithashu, ai shprehet se zgjedhjet janë vendimtare, sepse shteti është në udhëkryq.

“Qytetarët vendosin për izolimin ose integrimin. Besoj në fitore të Frontit për Evropën”, tha ai.