Shkarkohet ministri Jabllanoviq

Kryeministri Isa Mustafa tha në një konferencë për media, se nga dita e sotme ministri Jabllanoviq nuk është pjesë e kabinetit të qeverisë

Kërcënimi për protesta nga Lëvizja Vetëvendosje ka ndikuar që kryeministri Isa Mustafa ta shkarkojë nga detyra ministrin për Kthim dhe Komunitete, Aleksandër Jabllanoviq. Mustafa tha në një konferencë për media, se nga dita e sotme Jabllanoviq nuk është pjesë e kabinetit qeverisës.

Shkarkimi i Jabllanoviqit erdhi pas dy palë protestave që u organizuan në Prishtinë nga partitë opozitare, të cilat rezultuan me qindra të lënduar dhe dhjetar të arrestuar.

Jabllanoviq nxiti protesta gjithëpopullore pasi që me 7 janar, në ditën e Krishtlindjeve ortodokse i quajti “Egërsira” nënat gjakovare.

“Nga sot ministri Jabllanoviq nuk është pjesë e kabinetit qeveritar. Sa i përket Trepçës, po të mbetej ashtu siç ka qenë Trepça do të shkonte drejtë falimentimit”, ka thënë Mustafa.

Jabllanoviq i takon Listës Srpska,e  cila në Kuvendin e Kosovës i ka 9 deputetë. Kjo Listë është pjesë e koalicionit qeverisë, ndërsa përfaqësohet me dy ministra dhe njeë zëvendëskryeministër. Në mediet lokale në Prishtinë thuhet se shkarkimi i Jabllanoviqit, mund ta nxjerrë nga koalicioni Listën Serbe.