Laura Fazliu e bronztë në Botërorin në Abu Dabi

Të martën në Botërorin në Abu Dabi të Emirateve të  Bashkuara Arabe, xhudistja kosovare, Laura Fazliu u rendit e treta në kategorinë deri 63 kilogramë.  Për medalje të bronztë e mposhti kanadezen Catherine Beauchemin-Pinard.

Për Laurën është sukses historik, më i madhi në karrierën e deritashme.

Për xhudisten kosovare ishte gara e parë pas pauzimit prej disa muajsh për shkak të lëndimit muskulor. Laura ishte lënduar në Grand Slamin në Tbilisi të Gjeorgjisë më 22 mars. Prej atëherë nuk ka garuar.

Laura Fazliu ka medalje evropiane, medalje në Masters , garat Grand Slam e ato Grand Prix.

Ajo i bashkohet grupit shumë elitar të xhudisteve kosovare me medalje botërore. Majlinda Kelmendi, Nora Gjakova, Distria Krasniqi e Loriana Kuka janë në këtë grup./Koha.net