Azilkërkuesit, shkak për vizitën e ministres së brendshme austriake në Kosovë

Sipas Austrisë, azilkërkuesit e shumtë nga Kosova pa të drejtë po e popullojnë Austrinë

Gjatë tërë vitit 2014 në Austri kishin kërkuar azil 1901 refugjatë ndërsa vetëm në muajin janar të këtij viti nga Kosova u paraqitën 1029 kërkesa për azil.

Në javën e parë të janarit ishin edhe 558 kërkesa të reja. Këto shifra kanë ngjallur debate të mëdha në Austri ku në sy bien sidomos deklaratat e populistëve të djathtë austriakë të cilët kërkojnë kthimin e kosovarëve në atdhe.

Presioni është shtuar po ashtu që Kosova të shpallet “vend” i sigurt- gjë kjo e cila azilkërkuesve nuk do t’u jepte shansin të kërkojnë azil, shkruan gazeta blic.

Në frymën e këtij debati, mediat austriake kanë bërë të ditur që Ministrja e Brendshme e Austrisë Johanna Mikl- Leitner do të qëndrojë në Kosovë fillim javën që vjen. Ajo do të zhvillojë takime me udhëheqësit shtetërorë në Prishtinë kanë njoftuar mediat austriake.