Mustafa akuzon Krasniqin për marrëveshje me Kurtin

Deputeti i Lidhjes Demokratike të Kosovës, Besian Mustafa, i ka reaguar kryetarit të PDK-së, Memli Krasniqi, i cili akuzoi partitë e tjera opozitare për mosshpërndarjen e Kuvendit.

Deputeti i LDK-së, Besian Mustafa, ka thënë se Krasniqi duhet të kërkojë llogari nga ai të cilit i shkoi në darkë.

“Krasniqi ka bërë marrëveshje me Kurtin, jo me LDK-në, prandaj i pakuptimtë roli i tij si ndërmjetësues. Le të kërkojë përgjegjësi tek ideatori i vërtetë i shpërndarjes dhe te marrëveshja që ka bërë me të”, ka thënë ai për KOHËN.

Mustafa ka ripërsëritur qëndrimin e LDK-së që kryeministri duhet të dorëhiqet dhe pastaj vendi të shkojë në zgjedhje.

“LDK nuk bën marrëveshje me Kurtin. Qëndrimi ynë ka qenë i qartë dhe i zëshëm edhe para dakordimit tashmë të dështuar të tyre. Dorëheqje, më pas zgjedhje”, ka thënë Mustafa./Koha.net