Mbi 2 mijë familje u dëmtuan nga përmbytjet

Të dhënat e Ministrisë së Brendshme tregojnë se nga përmbytjet, kanë ngordhur rreth 53 mijë krerë bagëti dhe shpendë dhe 5975 hektarë tokë bujqësore gjendet nën ujë

Përmbytjet e fundit në Shqipëri kanë shkaktuar dëme të mëdha tek ekonomitë familjare por edhe në pronat e shtetit. Deri më tani mësohet se rreth 2 mijë familje po jetojnë në kushte të vështira, pasi kanë humbur banesat e tyre të cilat janë përmbytur apo janë bërë të pabanueshme nga uji.

Të dhënat e Ministrisë së Brendshme tregojnë se kanë ngordhur rreth 53 mijë krerë bagëti dhe shpendë dhe 5975 hektarë tokë bujqësore gjendet nën ujë.

Për këta mijëra qytetarë ditët e ftohta të këtij dimri janë shumë të vështira, ndaj qeveria ka kërkuar mbështetje për të përballuar këtë situatë emergjence.

Zyra e Kombeve të Bashkuara për Koordinimin e Çështjeve Humanitare, ka dhënë një grant prej 50 mijë dollarësh të cilët do të shkojnë në ndihmë të 250 familjeve më të prekura për një periudhë njëmujore, raporton TCH.

Por, në përgjigje të kërkesës së qeverisë për ndihmë, Koordinatorja e Kombeve të Bashkuara, përfaqësuesja e UNICEF-it, si dhe një grup ekspertësh po shohin nga afër zonat e prekura nga përmbytja në mënyrë që të japin një vlerësim të shpejtë për nivelin e mbështetjes që do të japë OKB.

Kombet e Bashkuara do të koordinojnë përpjekjet me Bashkimin Evropian dhe Bankën Botërore për të mbështetur qeverinë në vlerësimin e dëmeve të shkaktuara  me qëllim që komuniteti ndërkombëtar të mbështesë direkt masat e rimëkëmbjes së qëndrueshme të identifikuara nga qeveria shqiptare.

Ndryshe, sipas medieve në Tiranë, niveli i ujit në lumin Vjosë, Drin, Osum dhe Gjanicë, po bie dhe “situata në zonat e përmbytura pritet të përmirësohet gjatë ditëve në vijim, falë motit më  të mirë”. Në anën tjetër, qytetarët e dëmtuara nga vërshimet po i ndihmojnë edhe shtetet e rajonit, përfshirë edhe Luginën e Preshevës.