Vërshimet në Prishtinë, kryetari mbledh institucionet e sigurisë

Foto FB: Alban Zogaj

Kryetari i Prishtinës, Përparim Rama, një ditë pas vërshimeve ka takuar institucionet e sigurisë.

Ai tha se është duke u bërë edhe vlerësimi i dëmeve të shkaktuara nga vërshimet.

“Patëm një takim të koordinuar me Policinë, Ujësjellësin dhe zjarrfikësit dhe disa kompani të tjera private që janë përgjegjës për menaxhimin e rrugëve. Patëm diskutim për një strategji të re, ideja është që të jemi më koherent rreth qasjes të këtyre problematikave, po mundohemi t’i ndalojmë në mundësinë tonë si administratë e Kryeqytetit”, tha Rama, teksa bëri edhe një apel tek bizneset që t’i lirojnë më herët punëtorët e tyre.

“Dje kanë punuar deri në orët e vona në pjesë të ndryshme të kryeqytetit. Më herët e bëra edhe një kërkesë për institucionet publike dhe private, ju lutem që t’i lirojnë punëtorët më herët se në orën 16:00, për shkak të shirave të dendura dhe të mos ketë trafik”, tha Rama.

Ndërsa, fajtor për vërshime është edhe për shkak të dizajnimit të keq të pusetave e vjetërsia e tyre.

“Ne vetëm se kemi filluar intervenimet në rruge ‘B’ dhe ‘A’ dhe do të zgjidhet ky problem, sepse ky problem është kah mot. Disa prej lagjeve me vite të tera nuk kanë qenë të mirëmbajta, në pjesën e stacionit të autobusit e bëmë intervenimin e menjëhershëm. Dizajnimi i atyre pusetave nuk është i mjaftueshëm dhe për këtë biseduam ta bëjmë një projekt të ri për kanalizime”.

Drejtori për Siguri dhe Emergjenca, Lulzim Fushtica, tha se gjatë ditës së djeshme ka qenë një sasi e madhe e shiut dhe se dëmet janë të mëdha.

“Kanë shkuar në thirrjet direkt, afro 100 thirrje janë bërë, në të gjitha thirrjet është intervenuar. Vlerësimi i dëmeve është aktiv dhe do të merremi me çdo lloj dëmi të qytetarëve. Vetëm sasia e sotme, 65 milimetra për metër, është sasi e ujit që bëhet për një muaj të tëre, është sasi e madhe”, tha Fushica.