Në Bavari, rënie e lehtë e fluksit të refugjatëve kosovarë

bazuar në trendin në rënie të numrit të refugjatëve nga Kosova duket se nuk do të ketë nevojë për të gjitha kapacitetet emergjente të strehimit në dispozicion.

Ministria për Punë Sociale e landit të Bavarisë ka regjistruar një rënie të vogël të numrit të refugjatëve nga Kosova. “Por është ende herët të nxirren përfundime. Duhet të presim rrjedhën që do të kemi gjatë javës”, ka thënë për mediet gjermane një zëdhënës i kësaj ministrie.

Si reagim ndj rritjes drastike të numrit të azilkërkuesve kosovarë, ministrja e punëve sociale Emilia Müller gjatë javës që shkoi ka futur në fuqi planin emergjent dimëror për strehimin e refugjatëve.

Qeveritë e shtatë qarqeve të landit mbi këtë bazë kanë të drejtë t`i aktivizojnë të gjitha hapësirat emergjente. Nuk ka ndonjë regjistër se sa nga 20 mijë vendet që vihen në dispozicion në bazë të planit emergjent janë plotësuar, shkruan welt.de. Por, bazuar në trendin në rënie të numrit të refugjatëve nga Kosova duket se nuk do të ketë nevojë as të përafërt për të gjitha kapacitetet në dispozicion.

“Mirëpo, situata mund të ndryshojë nga ora në orë” ka thënë zëdhënësi i Ministrisë së Punëve Sociale.