Sihariqi i Pavarësisë: Federata e Notit pranon Kosovën

Federata Ndërkombëtare e Notit (FINA) e ka pranuar zyrtarisht Federatën e Notit e Kosovës anëtare me të drejta të plota. Kosova u bë anëtarja e 208-të e FINA-s

Në ditën e pavarësisë ka ardhur një lajmë i mirë për sportdashësit e notit. Federata Ndërkombëtare e Notit (FINA) e ka pranuar zyrtarisht Federatën e Notit e Kosovës anëtare me të drejta të plota. Me këtë vendim, notuesit kosovarë mund të marrin pjesë në lojërat evropiane të BAK-s, e madje nëse kualifikohen edhe në Olimpiadën e Rio de Janeiros.

Lajmin e ka bërë të ditur FINA, përmes uebfaqes së vetë zyrtare. Gjithashtu, Kosova do të mund të marrë pjesë edhe në Kampionatin Botëror të këtij viti, që mbahet në Kazan, edhe pse shteti organizator, Rusia, e kundërshton Pavarësinë e Kosovës, citon Zëri.

FINA është vetëm Federata e fundit ndërkombëtare që e pranon një sport kosovar. Pranimet nëpër federata të ndryshme erdhën pasi Komiteti Olimpik i Kosovës u bë pjesë e Komitetit Olimpik Ndërkombëtar, në dhjetor të vitit të kaluar. Kosova u bë anëtarja e 208-të e FINA-s dhe e 52-ta në Evropë.