Një fëmijë 2 vjeç nga Kosova vdes në Hungari

Vajza dy vjeçare është nga fshati Beguncë e komunës së Vitisë dhe njihet me emrin A.M. Ajo ka vdekur para dy ditësh gjatë përpjekjes së prindërve të saj për ikur në BE

Një vajzë dy vjeçare nga rajoni i Vitisë, ka humbur jetën në Hungari, gjatë përpjekjes së prindërve të saj për të ikur ilegalisht në vendet e Bashkimit Evropian. Kjo e çon në tre, numrin e vdekjeve të kosovarëve në “luftën e tyre” për të gjetur një jetë më të mirë jashtë Kosovës.

Siç raportohet, vajza dy vjeçare është nga fshati Beguncë e komunës së Vitisë, dhe njihet me emrin A.M. Në fshatin e prindërve të vajzës, Beguncë thonë se vajza ka ndërruar jetë para dy ditësh, ndërsa familja është në përgatitje të dokumentacionit për kthimin e trupit të saj nga Hungaria.

Kjo është viktima e tretë që humbë jetën gjatë përpjekjes për të dalë jashtë vendit. Derisa një 60 vjeçar nga rajoni i Pudujevës vdiq në autobus në kufirin Kosovë- Serbi, një tjetër burrë nga Ferizaj u gjet i mërdhirë në kufirin Serbi-Hungari.

Ndryshe, vetëm gjatë dy muajve të fundit më shumë se 50 mijë kosovarë kanë kaluar ilegalisht në Hungari.