Serbët kërkojnë dorëheqjen e Valon Muratit

Disa OJQ të komunitetit serb, kërkojnë dorëheqjen e ministrit Valon Murati, ndërsa nga Qeveria kërkojnë falje për një deklaratë, ku ai merr shkas serbët për migrimin masiv

Një deklaratë e ministrit të Diasporës, Valon Murati, i cili ka thënë se një nga shkaktarët  që qytetarët e Kosovës po ikin në BE, është pozita e privilegjuar e komunitetit serb, ka trazuar shoqërinë civile serbe. OJQ-të e këtij komuniteti nëpërmjet një deklarate për media, kërkojnë shkarkimin e ministrit Murati ndërsa nga Qeveria kërkojnë falje për këtë deklaratë.

Përfaqësues OJQ-ve serbe thonë se ministri Murati po ngjallë urrejtje ndërmjet komuniteteve dhe po ua hedh fajin komunitetit serb.

Ministri i diasporës ka thënë të hënën se “pozita e privilegjuar e komuniteteve joshqiptare, e veçanërisht ajo e komunitetit serb, është njëra prej arsyeve kryesore për emigrimin e shqiptarëve të Kosovës”. Sipas përfaqësuesve të shoqërisë civile serbe, kjo deklaratë nuk i kontribuon klimës së multietnicitetit në Kosovës.

“Kjo është, gjithashtu, një lloj presioni i Prishtinës me të cilin porositet se nuk do të heqë dorë nga qëndrimet e ngulitura dhe maksimaliste gjatë bisedimeve në Bruksel dhe nuk i lënë hapësirë zgjidhjes me kompromis ku edhe më tutje po zvarritet themelimi i Bashkësisë (Asociacionit) së Komunave Serbe”, thuhet në deklaratë.

Deklarata e ministrit Murati, sipas tyre, është shumë e rrezikshme dhe paraqet vazhdimin e mënyrës së njohur të elitës politike në Prishtinë, që fajtorin ta kërkojë te komuniteti serb.

“Deklaratat e tilla na dërgojnë drejt mobilizimit të njerëzve në baza etnike, e cila është drejtuar para së gjithash kundër komunitetit serb dhe në mënyrë të drejtpërdrejtë e rrezikon sigurinë fizike të qytetarëve dhe të pasurisë së komuniteteve joshqiptare”, thuhet më tej në deklaratë.