Për 7 vjet,1022 persona morën shtetësi kosovare

Brenda shtatë vjetëve të kaluar, shtetësinë e Kosovës e kërkuan 2760 qytetarë të huaj, ndërsa 1022 prej tyre e fituan pasaportën kosovare, të tjetër 1739, u refuzuan

Nga viti 2009 deri më tani, mbi 2760 shtetas të huaj kanë kërkuar shtetësinë e Kosovës,  ndërsa vetëm 1022 prej tyre e kanë fituar këtë të drejt. Kështu raportojnë përfaqësuesit e  Ministrisë së Punëve të Brendshme të Kosovës, sipas të cilëve, 1739 aplikuesve u është refuzuar kërkesa për nënshtetësi.

Ndërsa vetëm në dy muajt e parë të këtij viti, siç tha Liridona Neziri, udhëheqës në Divizionin për Shtetësi në MPM, janë pranuar 120 kërkesa.

“Shtetësia e Republikës së Kosovës ka filluar në vitin 2008 pas shpalljes së Pavarësisë së Kosovës, ndërkaq në vitin 2009 është themeluar Departamenti për Shtetësi, ku një vit më vonë është inkorporuar me një departament që quhet Departamenti për Shtetësi, Azil dhe Migracion”, ka thënë Neziri për Telegrafin.

Sipas tij, që nga viti 2009 dhe deri në këtë periudhë janë diku rreth 1022 persona që kanë fituar shtetësinë e Republikës së Kosovës, ndërsa numri i përgjithshëm i atyre që kanë kërkuar shtetësi është 2760. Nga 2760, 1022 persona kanë fituar shtetësinë, ndërsa kërkesa i është refuzuar 1739 personave.

Neziri tha se janë tri mënyra të fitimit të shtetësisë: me qëndrim në Republikën e Kosovës, me bashkim familjar si dhe me dekretim nga presidentja. Sipas Nezirit, dekretimi i Presidentes është një kategori e veçantë edhe me konventën ndërkombëtare sepse këta persona nuk i plotësojnë asnjë nga kushtet të cilat kërkohen, por interes i madh shtetëror.

“Sa i përket shqyrtimit të kërkesës për shtetësi është një kohëzgjatje e caktuar prej gjashtë muajsh, por për shkak se jemi efikas në trajtimin e kërkesave e kryejmë brenda afatit prej tre muajsh”, deklaroi Neziri.