Ferizaj, 9 % e qytetarëve vuajnë nga diabeti

Çdo i dhjeti qytetarë i komunës së Ferizajt është i prekur nga sëmundja e sheqerit, diabeti prandaj kjo komunë mëton të bëhet qendër kryesore e diabetëve për tërë Kosovën. Kështu u tha gjatë një takimi që Muharrem Svarqa, kryetar i kësaj komune zhvilloi me përfaqësuesit e Fondacionit botëror të Diabetit dhe atyre të Qendrës Kryesore të Mjekësisë Familjare në Ferizaj.

“Udhëheqësit e Fondacionit Botëror të Diabetit, në mesin e të cilëve edhe menaxheri për Kosovë, konfirmuan bashkëpunimin që do të vazhdojë në kuadër të të gjitha projekteve që kanë të bëjnë me diabetin dhe me përkrahjen konkrete të të gjitha programeve të cilat ka kaluar kështu si një pretendente për t’u shndërruar në një qendër diabetike për tërë Kosovën”, tha Svarqa.

Ky fondacion ka investuar kohë më parë në dy qendra të mjekësisë familjare. Se këto dy qendra i kanë shfrytëzuar mirë investimet në favor të trajtimit të duhur të diabetikëve, theksoi edhe koordinatorja e programit nga ky fondacion, citon KP.

“Ju i keni arsyetuar investimet që ne i bëmë kohë më parë në dy qendra të mjekësisë familjare në Ferizaj. Vetëm dëshiroj që të avancohet edhe më tej sistemi i edukimit, të ndryshohet stili i jetesës dhe të kihet parasysh marrja e ushqimit të shëndetshëm”, tha koordinatorja e programit, Susanne Brixtofte Olejas.

Ndërsa menaxheri i këtij fondancioni në Kosovë, Luan Gola tha se edhe në të ardhmen do të mbështeten nismat e projekteve nga kjo qendër shëndetësore në Ferizaj.

Dy qendrat diabetike në Ferizaj, njëra për edukim dhe tjetra për trajtim, ka vite që janë hapur dhe në to marrin trajtime ditore dhjetëra pacientë. Ndërkaq sipas statistikave të këtyre qendrave rreth 9 për qind e ferizajasve vuajnë nga sëmundja e diabetit.