35 azilkërkues do të kthehen me autobus nga Hungaria

Ata do të kthehen me autobus nga Budapesti nëpër Serbi. Lajmin e kanë konfirmuar për mediet lokale zyrtarë të Ministrisë së Punëve të Brendshme të Kosovës

Rreth 35 qytetarë të Kosovës që kishin kërkuar azil në Hungari, do të kthehen pasnesër nëpër të njëjtën rrugë që kishin shkuar ilegalisht. Ata do të kthehen me autobus nga Budapesti nëpër Serbi. Lajmin e kanë konfirmuar për mediet lokale zyrtarë të Ministrisë së Brendshme të Kosovës.

Deri më tani Hungaria i ka kthyer kosovarët azilkërkues me rrugë ajrore, por të mërkurën e 25 marsit do të vijë edhe autobusi i parë me 35 kosovarë nga atje. Kështu ka konfirmuar për lajmi.net, Valon Krasniqi, drejtor i Departamentit për Migrim në MPB.

“Tash do të bëhet edhe kthimi nëpërmjet rrugëve tokësore. Sot e kemi marrë njoftimin nga Ambasada e Hungarisë që 35 persona kthehen në pikëkalimin në Merdarë më 25 mars, në orën 13:00”, theksoi ai.

Ky është kthimi i parë me autobus, ndërsa deri më tani janë kthyer rreth 200 azilkërkues me aeroplanë nga Hungaria, Austria e Gjermani. Ndryshe, vetëm gjatë gjashtë muajve të fundit më shumë se 100 mijë kosovarë kanë migruar ilegalisht nëpër vendet e Bashkimit Evropian. ky është konsideruar si eksodi më i madh i 15 vjetëve të pasluftës.