Opozita në Kosovë fton qytetarët në protesta

Opozita vendosi që sërish t’u kthehet protestave për të shprehur pakënaqësitë me Qeverinë

Paritë opozitare, Vetëvendosje, AAK-ja dhe Nisma për Kosovën, u kanë bërë thirrje qytetarëve të Kosovës që më 18 prill prej orës 14:00 të dalin në protesta kundër, siç thanë përfaqësuesit e këtyre subjekteve, kundër kapjes së shtetit.

Opozita vendosi që sërish t’u kthehet protestave për të shprehur pakënaqësitë me Qeverinë.

“Protestat janë e vetmja zgjidhje për këtë shtet”, ka thënë deputeti i VV-së Glauk Konjufca, në një konferencë të përbashkët për media me deputeten e AAK-së, Donika Kada-Bujupi dhe Valdete Osmani.

Konjufca ka bërë thirrje që protesta të jetë paqësore.

“Ftojmë policinë që të mos jetë e dhunshme. Por, nëse policia provokon, atëherë qytetarit nuk mund t’i mbyllet syri ndaj pushtetit dhe të thuhet se protesta do të jetë paqësore”, u shpreh Konjufca.

Shefja e Grupit Parlamentar të AAK-së, Donika Kadaj-Bujupi, ka thënë se Qeveria duhet të kërkojë falje për gjendjen në të cilën gjendet vendi, ose të shkojë në shtëpi.

“Zhvillimet e deritanishme dhe gjendja në Kosovë na ka detyruar neve si opozitë që të bashkohemi edhe një herë për këtë protestë gjithëpopullore. I ftojmë qytetaret që të na bashkohen”, deklaroi ajo.