Shembje dheu, rrugët vështirë të kalueshme

Derisa magjistralja Prishtinë ­ Hani i Elezit ka disa dit që është vështirësuar për qarkullim, shembje dheu ka edhe në Rrugën e Kombit në rajonin e Kukësit

Reshjet e shiut dhe borës kanë shkaktuar shembje të dheut në dy akset rrugore që lidhin Kosovën me Shqipërinë dhe Maqedoninë. Derisa magjistralja Prishtinë­Hani i Elezit ka disa dit që është vështirësuar për qarkullim, autoritetet shqiptare raportojnë për shembje dheu edhe në Rrugën e Kombit në rajonin e Kukësit.

Në magjistralen Prishtinë ­ Hani i Elezit rruga është vështirë e kalueshme të vendi “Kulla me qeshme” ku po ka vazhdimisht shembje dheu. Autoritetet apelojnë që të mos merret kjo rrugë, përveç në rastet e pashmangshme. Patrullat e Policisë së Kosovës janë vendosur te “Fushën e Pajtimit”, për t’i orientuar shoferët e automjeteve që të kalojnë nëpër Glloboçicë nëse duan të shkojnë në Maqedoni.

“Shembja e dheut dhe e gurëve ka ndodhur në vendin e quajtur ‘Te kulla me çeshme’, ndërmjet Kaçanikut dhe Hanit të Elezit, duke pamundësuar lëvizjen e makinave në të dy drejtimet”, ka thënë zëdhënësi rajonal i Policisë së Kosovës, Agim Gashi.

Sipas burimeve të policisë, në vendin e ngjarjes kanë dalë njësitet policore të trafikut si dhe punonjës të kompanisë, të cilët janë duke punuar në rehabilitimin dhe zhbllokimin e saj, pa dhënë ndonjë afat se kur mund të ndodhë kjo, pasi disa ditë është duke u punuar në atë vend në sanimin e gjendjes.

Ndërkohë, Autoriteti Rrugor Shqiptar ka njoftuar mëngjesin e sotëm se ka ndodhur një rrëshqitje masivi shkëmbor në Rrugën e Kombit, në vendin e quajtur Kolsh, 7 km nga Kukësi. Kjo shkarje masive ka bllokuar njërën korsi të rrugës.

“Drejtuesit e mjeteve të bëjnë kujdes me respektimin e sinjalistikës,” thuhet në njoftimin e Autoritetit Rrugor Shqiptar. Kohët e fundit si pasojë e motit të keq kanë ndodhur shumë situata të ngjashme në Rrugën e Kombit, që kanë vështirësuar kalimin e automjeteve.