Suedia, shembull i mësimit shqip në diasporë

Suedia ndër shembujt më të mirë të organizimit të mësimit të gjuhës shqipe në diasporë, deklaroi ministri Valon Murati

Suedia është një ndër shembujt më të mirë të organizimit të mësimit të gjuhëve të komuniteteve, në këtë kuadër edhe të gjuhës shqipe, si dhe të integrimit të komuniteteve në përgjithësi. Kështu deklaroi ministri i Diasporës, Valon Murati gjatë një takimi që zhvilloi me nxënësit dhe mësuesit shqiptarë të 5 shkollave të mësimit plotësues në Suedi.

Nxënësit, të shoqëruar nga mësuesit e mësimit plotësues, kishin ardhur për një vizitë-ekskursion mësimor në Kosovë – Shqipëri. Ky është ekskursioni i tretë me nxënësit nga Suedia, i organizuar dhe i mbështetur nga Ministria e Diasporës.

Në këtë takim me nxënësit, ministri Murati tha se ka kënaqësinë që takohet me një pjesë të atdheut që ka dhënë kontribut të madh për ruajtjen e identitetit kombëtar e kulturor, si dhe për mbajtjen gjallë të gjuhës shqipe.

Murati i informoi mysafirët me marrëveshjen Kosovë –Shqipëri për organizimin e përbashkët të mësimit plotësues në diasporë, për programe kulturore të përbashkëta, në mënyrë që para të tjerëve të paraqiten vlerat më të mira dhe më cilësore të popullit shqiptar.

Ndërkaq, mësuesit dhe nxënësit shqiptarë të Suedisë e falënderuan MeD-në për organizimin e këtij ekskursioni. gjithashtu, falënderuan për librat e dërguar për mësimin plotësues, duke thënë se temat që kanë librat përshtaten shumë me ato suedeze dhe se ndihma që jepet nga MeD-ja me libra është një shembull edhe për komunitetet që vijnë nga gjuhët e tjera.