Pesë mesfushorë me origjinë nga Kosova në mesin e më të mirëve të vitit

(KEYSTONE/Peter Klaunzer)

Gazeta prestigjioze zvicerane Sport.ch ka publikuar listën e 10 mesfushorëve ofanzivë më të mirë për vitin që lamë pas në Kampionatin e Futbollit të Zvicrës.

Dominimi shqiptar në futbollin zviceran: Pesë mesfushorë me origjinë nga Kosova në mesin e më të mirëve të vitit.

Lista pasqyron talentin dhe ndikimin e lojtarëve shqiptarë, pasi gjysma e të renditurve janë me prejardhje nga Kosova.

Në krye të listës ndodhet ylli i njohur i futbollit shqiptar, Xherdan Shaqiri. Futbollisti 33-vjeçar, i cili këtë vit u rikthye te skuadra e Baselit, ka shkëlqyer me paraqitjet e tij, duke qenë një nga shtyllat kryesore të ekipit. Shaqiri realizoi pesë gola dhe dha tetë asistime në vetëm 14 ndeshje, duke dëshmuar edhe një herë aftësitë e tij të jashtëzakonshme.Në vendin e tretë të listës renditet Donat Rudhani, i cili luan për skuadrën e Luzernit. Mesfushori kosovar ka qenë një lojtar kyç për ekipin e tij, duke kontribuar me pesë gola dhe tri asistime në 16 ndeshje.

Në mesin e më të mirëve të kampionatit zviceran janë gjithashtu edhe tre futbollistë të tjerë me origjinë nga Kosova:Bastien Toma, i cili luan për St. Gallen, është renditur në vendin e tetë.Bledian Krasniqi, mesfushor i FC Zurich, ka siguruar vendin e nëntë.Uran Bislimi, që mbron ngjyrat e FC Lugano, është renditur i dhjeti.

Ky sukses reflekton ndikimin e fuqishëm të futbollistëve me prejardhje shqiptare në kampionatin zviceran. Talentet nga Kosova jo vetëm që kanë arritur të përfaqësojnë me dinjitet komunitetin e tyre, por gjithashtu kanë lënë një gjurmë të thellë në një nga kampionatet më konkurruese të Evropës.Xherdan Shaqiri, si lider i listës, dëshmon vazhdimisht qëndrueshmërinë dhe përkushtimin e tij si një nga emrat më të mëdhenj të futbollit shqiptar. Ndërkohë, të tjerët si Rudhani, Toma, Krasniqi dhe Bislimi përfaqësojnë brezin e ri të talentëve që po ngrihen me hapa të sigurtë në skenën ndërkombëtare.Ky është një vit i jashtëzakonshëm për futbollistët shqiptarë në Zvicër, dhe pritet që ndikimi i tyre të vazhdojë të rritet në të ardhmen.