Çfarë dihet deri më tani për uljen emergjente fatale të avionit zviceran?

(KEYSTONE/Christian Merz)

Më shumë pyetje po lindin për dështimin mekanik që kishte detyruar një aeroplan SWISS të bënte një ulje emergjente në Austri, duke i marrë jetën një anëtari të ekuipazhit.

Më 23 dhjetor, një aeroplan SWISS në rrugën nga Bukureshti në Cyrih bëri një ulje emergjente në Graz, Austri, për shkak të “problemeve të motorit dhe zbulimit të tymit në kabinë”, tha linja ajrore.

Ndërsa 74 pasagjerët në bord u zbarkuan në mënyrë të sigurt, katër anëtarë të ekuipazhit u trajtuan nga mjekët në vend.

Një stjuardesë, megjithatë, u transportua me avion në një spital lokal, ku mbeti në gjendje kritike teksa ndërroi jetë më 30 dhjetor.

Linja ajrore lëshoi ​​një deklaratë duke i ofruar ngushëllime familjes së anëtares së ekuipazhit, por duke mos hedhur dritë mbi shkakun e vdekjes apo vetë aksidentin, shkruan thelocal.

Kjo është ajo që dihet deri tani

Megjithëse SWISS nuk po zbulon asnjë detaj në pritje të hetimeve të mëtejshme, mediat zvicerane kanë raportuar se analizat fillestare tregojnë një “defekt të panjohur më parë” në motorin e Airbus A220.

Ai është çmontuar dhe i është dërguar prodhuesit me bazë në SHBA, Pratt & Whitney, për ekzaminim.

Ndërkohë autoritetet austriake kanë urdhëruar autopsinë e trupit të anëtarit të ekuipazhit.

Stjuardesa e ndjerë, e cila nuk është identifikuar për arsye privatësie, mbante një pajisje të frymëmarrjes për anëtarët e ekuipazhit, e krijuar për të parandaluar ndotjen e mushkërive nga tymi.

Megjithatë, mediat zvicerane raportuan se kompania ajrore është dashur të zëvendësojë këtë pajisje, pasi paraprakisht është konstatuar pjesërisht me defekt.

Kjo nuk është bërë, por shkakësia midis pajisjes me defekt dhe vdekjes së anëtares së ekuipazhit nuk është vërtetuar ende.