Qyteti i Cyrihut po përgatitet për festat e fundvitit me tregje tradicionale, ndriçime festive, koncerte korale dhe aktivitete për të gjitha moshat. Ndër atraksionet kryesore janë tregu i madh në stacionin qendror, pema kënduese e Krishtlindjeve dhe fshati festiv në sheshin Bellevue, transmeton albinfo.ch.
Gjatë periudhës së Adventit, vizitorët mund të shijojnë disa nga tregjet më të njohura të Krishtlindjeve në qytet. Në stacionin kryesor të trenave, Christkindlimarkt sjell mbi 100 shtëpiza tregtare, me dhurata, ëmbëlsira dhe pije të ngrohta. Për shkak se është i mbuluar, ai mund të vizitohet edhe në ditë me mot të keq.
Një tjetër destinacion është tregu tradicional në lagjen Niederdorf, i njohur për atmosferën romantike mes ndërtesave historike. Ndërsa në sheshin Sechseläutenplatz, pranë Operës së Cyrihut, vizitorët mund të shijojnë fshatin festiv Bellevue Noël, me rreth 100 tezga, një hapësirë për fondue dhe një kurorë të madhe Adventi.
Edhe zona e Europaallee pranë stacionit qendror ofron një përvojë të veçantë, me rreth 80 tezga ushqimore që ndërrohen vazhdimisht, produkte artizanale, dizajn lokal dhe specialitete kulinare.
Një nga atraksionet më të veçanta është The Singing Christmas Tree në sheshin Werdmühleplatz, ku mbi 40 kore lokale interpretojnë këngë festive nga një strukturë e madhe në formën e pemës së Krishtlindjeve. Koncertet zgjasin rreth 30 minuta dhe krijojnë një atmosferë të veçantë në qendër të qytetit./Albinfo.ch