Zvicra do e kryesojë OSBE-në në 2026

Foto: Embassy of Switzerland in Albania, FB

Zvicra do të kryesojë Organizatën për Siguri dhe Bashkëpunim në Evropë OSBE në vitin 2026.

“Faleminderit të gjitha shteteve pjesëmarrëse që votuan! Përballë sfidave aktuale të sigurisë, Zvicra është e përkushtuar ndaj dialogut dhe bashkëpunimit dhe synon të ruajë aftësinë e OSBE-së për të vepruar si një platformë për zgjidhje konstruktive”, thuhet në njoftimin e Ambasadës së Zvicrës në Shqipëri.

Zvicra do të kryesojë OSBE-në për herë të tretë, pasi e bëri këtë në 1996 dhe 2014. “Ne jemi të bindur se Zvicra do të udhëheqë me vizion dhe vendosmëri,” tha Ministri i Jashtëm maltez, Ian Borg në platformën X.

Sipas Ministrisë së Jashtme të Zvicrës, Zvicra po merr drejtimin e OSBE-së në një kohë kur organizata po kalon kohë të vështira. Kjo është për shkak të zhvillimeve gjeopolitike, si dhe sulmit ushtarak të Rusisë ndaj Ukrainës. Fakti që dy shtete pjesëmarrëse të OSBE-së janë në luftë me njëri-tjetrin, kufizon ashpër hapësirën e manovrës së organizatës, shtoi ministria.

“Duke pasur parasysh sfidat aktuale të sigurisë, Zvicra ripohon se dialogu dhe bashkëpunimi janë thelbësore për të gjetur zgjidhje të qëndrueshme për të ardhmen tonë,” shkroi ministria në X.