Musk zbuloi planin e Neuralink: Planifikohet implantimi i dhjetëra çipave në pacientët e palëvizshëm deri në fund të vitit

EPA/ALEXANDER BECHER

Neuralink ka implantuar me sukses çipin e saj të lidhjes tru-kompjuter në një pacient të tretë, zbuloi themeluesi i kompanisë Elon Musk në një bisedë të transmetuar në platformën X.

Siç theksoi ai, të tre implantet po funksionojnë mirë dhe plani është që deri në fund të vitit të vendosen edhe 20 deri në 30 implante të tjera.

Si për kujtesë, ky është një implant eksperimental që lejon trurin të lidhet me një ndërfaqe kompjuteri, duke lejuar kështu njerëzit e palëvizshëm ose me aftësi të kufizuara të përdorin kompjuterët. Pacienti i parë që mori një implant Neuralink një vit më parë ishte Noland Arbaguh.

Neuralink aktualisht po kryen dy studime për pajisjet e saj. Sipas Administratës së Ushqimit dhe Barnave (FDA), Studimi Kryesor do të kryhet në pesë pacientë dhe do të testojë nëse është e mundur që pacientët e paralizuar të kontrollojnë pajisjet e jashtme si kompjuterët ose telefonat inteligjentë me mendjen e tyre. Studimi i dytë, Convoy, është projektuar për tre pacientë dhe u lejon atyre të kontrollojnë pajisje të tilla si krahët robotikë ndihmës.

Për më tepër, Neuralink mori miratimin nga rregullatori kanadez në fund të nëntorit 2024 për të kryer një studim klinik në Kanada dhe ftoi të gjithë tetraplegjikët e interesuar të regjistroheshin në regjistrin e tyre dhe të kontrollonin nëse janë kandidatë të përshtatshëm për të marrë pjesë në studim.