Shqipëri: Për 72 orë 10 mijë të regjistruar për votim jashtë vendit

Në më pak se 72 orë që nga momenti hapjes së procesit të regjistrimit të votuesve nga jashtë, ka shkuar në 10 mijë numri i regjistrimeve në Shqipëri.

Kryekomisioneri Shtetëror i Zgjedhjeve Ilirjan Celibashi në një postim në rrjetet sociale iu bën thirrje të gjithë shtetasve shqiptarë që duan të votojnë në zgjedhjet parlamentare të 11 majit që të regjistrohen sa më parë.

“KQZ Shqipëri nxit të gjithë shtetasit shqiptarë që duan të votojnë nga jashtë të regjistrohen sa më parë për të marrë pjesë në Zgjedhjet për Kuvendin të datës 11 Maj 2025. Shpërndani linkun e mëposhtëm që të aplikojnë edhe miqtë dhe të afërmit tuaj.

Regjistrimi është i lehtë dhe i shpejtë. Vizitoni diaspora.kqz.gov.al dhe mos e humbni këtë mundësi unike për të shkruar historinë bashkë.Vota Jote, Zëri Yt për Shqipërinë! Voto për Zgjedhjet e 11 Majit”, shkruan Celibashi.

Po ashtu kryekomsioneri nënvizon më tej “Shkarkoni aplikacionin mobile KQZ për Android dhe IOS, ose vizitoni www.kqz.gov.al (rubrika Votues nga Jashtë) për të marrë të gjitha informacionet se si mund të votoni nga jashtë territorit të Shqipërisë për zgjedhjet për Kuvendin e Shqipërisë 2025”.

Sipas të dhënave të bëra publike nga Komisioni Qendror i Zgjedhjeve (KQZ), janë miratuar 1662 kërkesa.

Sipas gjinisë, në përqindjen më të lartë të regjistruesve janë meshkuj me 7148 (71,13%) kërkesa, ndërsa femrat janë 2901 (28,87%).

Për sa i takon kërkesave për regjistrim sipas grup-moshave, numrin më të lartë të kërkesave e ka grup-mosha 26-35 vjeç me 3128 kërkesa, më pas grup-mosha 36-45 vjeç me 2731 kërkesa, nga grup-mosha 46-55 janë regjistruar 1878 dhe mbi 56 vjeç janë 1278 kërkesa për regjistrim.

Më të rinjtë, grup-mosha 18-25 vjeç kanë numrin më të vogël të kërkesave, me 1026 të tilla. Sipas të dhënave janë refuzuar 262 kërkesa.