Policia arreston një të dyshuar për sulmin fizik ndaj një mjeku të Klinikës Infektive

ks

Policia ka njoftuar se ka arrestuar një person nën dyshimin se e ka sulmuar fizikisht mjekun e Kliniken Infektive në QKUK, Nderim Hasani.

Sipas Policisë, rasti ka ndodhur të mërkurën dhe është cilësuar si rast i lëndimit të lehtë trupor.

“Është arrestuar i dyshuari mashkull kosovar, pasi që i njëjti ka sulmuar viktimën mjek në Klinikën Infektive. Viktima ka pranuar trajtim mjekësor, ndërsa i dyshuari, pas intervistimit me vendim të prokurorit, është dërguar në mbajtje”, thuhet në njoftimin e Policisë.

I kontaktuar nga KOHA, mjeku i sulmuar nuk ka treguar për arsyet e incidentit që ndodhi brenda Klinikës Infektive.

“Rasti është procesuar në rrugë ligjore. Për informata të mëtejme ju lutemi referojuni njoftimeve nga ana e organeve të shtetit”, ka thënë ai.

KOHA ka tentuar ta kontaktojë edhe drejtorin e Infektives, Arben Vishaj, si dhe Shërbimin Spitalor Klinik Universitar, por nuk ka marrë përgjigje.