Shpallen fituesit e logos “Ditët e Diasporës”

Edhe pse zyrtarisht ende nuk janë bërë të ditur emrat e fituesve për logon “Ditët e Diasporës”, megjithatë, Ministria e Diasporës ka publikuar fituesit në bazë të kodeve që kanë dërguar.

Të gjithë ata që kanë dërguar propozimet e tyre për logo në këtë konkurs, është dashur që përmes shifrës të prezantohen, dhe jo sipas emrit apo ndonjë formë tjetër.

Pas shqyrtimit të hollësishëm të propozimeve të shumta dërguar në Ministrinë e Diasporës, komisioni për përzgjedhjen e logos së Diasporës, i themeluar me vendim të u.d. Sekretarit të Përgjithshëm, në bazë të konkursit të shpallur më 16.3.2015, vendosi:

Propozimi i dërguar nga autori që mban shifrën K457A1 të shpallet fitues i konkursit të hapur për logon “Ditët e Diasporës”.

Çmimi i dytë i ndahet propozimit të autorit që mban shifrën DX3, thuhet në njoftimin e Ministrisë së Diasporës, njofton “albinfo.ch”.

Sipas njoftimit të ministrisë, kërkohen që autorët të paraqiten në Ministrinë e Diasporës, në Zyrën e Sekretarit të Përgjithshëm, në një afat prej 10 (dhjetë) ditësh pune, nga data e publikimit të vendimit në portalin zyrtar të Ministrisë së Diasporës, për t’i aranzhuar procedurat e mëtejshme administrative.

Njëkohësisht, Ministria e Diasporës i falënderon të gjithë aplikantët për vullnetin, kohën dhe idetë e ndryshme të prezantuara, duke u uruar suksese në punën e tyre.

Burimi: http://med.rks-gov.net/med/shpallet-fituesi-logos-ditet-e-diaspores/

---