Në Cyrih u protestua kundër dhunës në Kumanovë

Sot në Helvetia Platz të Cyrihut u mbajt një protestë spontane në kundërshtim të dhunës që po ushtron qeveria maqedonase kundër popullatës civile shqiptare të komunës së Kumanovës.

Me ftesën e diasporës së Maqedonisë të kantonit të Cyrihut të bërë nëpërmes Facebook-ut u mblodhën një numër rreth njëqind vetash dhe shprehën pakënaqësinë e tyre për gjendjen aktuale në Maqedoni.

Të tubuarit i përshëndeti Blerim Rrustemi nga Gostivari, pastaj Fatmir Brajshori mësues i gjuhës shqipe dhe Kadri Ismaili nga Alba Radio (me prejardhje nga Kumanova). Fjalën e mori edhe gruaja e dëshmorit Agim Bajrami, Zarije Zenuni Bajrami.

Të gjithë të pranishmit dhe ata që morën fjalën e dënuan dhunën që po ushtrohet nga policia maqedonase kundër popullatës shqiptare në Kumanovë.

---