Nga fillimi i luftës, në ISIS u vranë 41 kosovarë

Në bazë të këtyre informacioneve deri tash mbi 41 persona janë deklaruar si të vrarë, ndërsa besohet se aktualisht në zonën e konfliktit janë 80 deri në 100 persona

Që nga fillimi i luftës qytetare në Siri dhe Irak janë vrarë 41 qytetarë të Kosovës të cilët kanë shkuar vullnetarisht atje. Këta kosovarë kanë shkuar në luftrat arabe për t’i mbështetur grupet e njohura si Al-Nusra dhe ISIS (Shteti Islamik), që konsiderohen terroriste nga komuniteti demokratike ndërkombëtar.

Fatos Makolli, drejtor i Departamentit për Anti-Terrorizëm në Policinë e Kosovës, tha për REL, se në bazë të disa të dhënave që ka policia, janë rreth 250 qytetarë shqiptarë nga Kosova që kanë marrë pjesë në vatrat e luftës në Lindjen e Mesme.

“Në bazë të këtyre informacioneve deri tash mbi 41 persona janë deklaruar si të vrarë, ndërsa besohet se aktualisht në zonën e konfliktit janë 80 deri në 100 persona. Kur flasim për personat që kanë humbur jetën, duhet të kemi parasysh se këta persona janë të deklaruar si të vdekur, kryesisht në bazë të burimeve të ndryshme që ka policia në dispozicion”, tha Makolli.

Policia e Kosovës, sipas tij, lidhur me ketë fenomen është duke vepruar më të gjitha kapacitetet që ka dhe si rezultat, kohëve të fundit ka arritur që të ndalojë rreth 20 persona, të cilët kanë tentuar të shkojnë në Siri.

“Janë ndaluar mbi 20 të rinj, të cilët po tentonin të shkonin në Siri. Ata janë ndaluar në Aeroportin e Prishtinës, disa në pikat kufitare me Turqinë, Shipërinë dhe vende të tjera, janë ndaluar dhe janë kthyer në Kosovë”, ka treguar Makolli.

Ai tha se aktualisht mjetet më të fuqishme për propagandë dhe rekrutime të reja për të shkuar në vatrat e luftës në Lindjen e Mesme janë rrjetet sociale.

“Kohëve të fundit është vërejtur edhe një trend, vajza të reja, pas kontakteve përmes rrjeteve sociale që kanë me persona, qofshin ata nga shqiptarë nga Kosova apo shqiptarë të vendeve tjera të rajonit, tentojnë për të udhëtuar në Siri me persona qofshin ata kosovar apo shqiptar të vendeve të tjera të rajonit”, ka shpjeguar Makolli.

Skender Perteshi, hulumtues nga Qendra Kosovare për Studime të Sigurisë në Prishtinë, thotë se nga hulumtimet e bëra në raportin e publikuar javë me parë, ku flitet për përfshirjen e qytetarëve të Kosovës në luftërat e Sirisë dhe Irakut, të dhënat tregojnë se atje kanë humbur jetën rreth 40 shqiptarë nga Kosova.