Policia shqiptare me dron kundër krimit

Policia e Shtetit në Shqipëri testoi një dron, i cili do të përdorët në operacione të posaçme për kapjen e personave në kërkim, ndjekje policore dhe monitorimin e tubimeve nga ajri

Deri në ndeshjen eliminatore të futbollit për Franca 2016, ndërmjet Serbisë dhe Shqipërisë, përdorimi i dronëve nuk ka qenë praktikë, as për qytetarët e as për institucionet e sigurisë. Tanimë, përdorimi i fluturakëve pa pilot është bërë trend, sidomos në vendet ballkanike. Një dron të tillë e kanë testuar sot institucionet  e sigurisë në Tiranë.

Sipas një njoftimi, Policia e Shtetit në Shqipëri testoi një dron, i cili do të përdorët më pas në operacione të posaçme për kapjen e personave në kërkim, ndjekje policore, monitorime nga ajri të tubimeve të ndryshme.

Ministri i Punëve të Brendshme, Saimir Tahiri dhe drejtori i Policisë së Shtetit, Haki Çako ndoqën testimin në Akademinë e Sigurisë.

Ekspertët demostruan parametrat e dronit në ndjekje të mjeteve në autostradë, që shkonin mbi 80 km/orë, kohëzgjatjen në fluturim rreth dy orë në mënyrë të pavarur, monitorimin e zonave informale për ndërtime pa leje etj. Ky dron u konsiderua si teknologjia më e lartë në ndihmë të policisë.