Maqedoni: 20 mijë punëtorë sezonalë hyjnë në sistem, çfarë ndryshon nga janari?

Albert Hyseni's

Nga 1 janari i vitit të ardhshëm, një kapitull i ri hapet për punëtorët sezonalë në Maqedoninë e Veriut. Një ligj i ri, që pritet të përfshijë rreth 20 mijë persona, është hartuar për të formalizuar dhe mbrojtur këtë kategori të rëndësishme të fuqisë punëtore.

Deputeti i VMRO-DPMNE-së, Bojan Stojanovski, thekson se ligji synon të godasë ekonominë gri dhe të sjellë përfitime për të gjithë  punëtorët, punëdhënësit dhe vetë shtetin. “Përmes këtij rregullimi, jo vetëm që do të formalizojmë mijëra punësime, por do të rrisim edhe të ardhurat nga kontributet dhe taksat. Kjo është një çështje që e kemi zvarritur për 34 vjet”, u shpreh ai, transmeton alsat përcjell albinfo.ch.

Nga ana tjetër, David Oberhuber nga Shoqata Gjermane për Bashkëpunim Ndërkombëtar, organizatë që mbështet financiarisht projektin, vlerëson se ky hap do të sjellë më shumë transparencë dhe stabilitet ekonomik. “Të gjithë përfitojnë: punëtorët fitojnë të drejta, punëdhënësit operojnë më lehtë, dhe shteti fiton në të ardhura”, tha ai.

Një pjesë kyçe e reformës do të jetë digjitalizimi i procesit. Marija Risteska nga Qendra për Kërkime dhe Krijim Politikash tregon se regjistrimi i punëtorëve do të bëhet përmes një aplikacioni të thjeshtë online, i përdorshëm nga çdo vend  nga shtëpia, puna, apo edhe nga pushimet në plazh.

Ligji do të lejojë që edhe studentët, pensionistët dhe personat e papunë të angazhohen në punë sezonale pa humbur përfitimet e tyre aktuale. Në një kohë kur informaliteti ekonomik është ende i përhapur, ky hap shihet si një zgjidhje e shumëpritur për mijëra qytetarë dhe një mundësi për rritje të të ardhurave kombëtare.