Mbi 18 mijë hotele nga 32 shtete evropiane janë përfshirë në një padi kolektive kundër platformës së rezervimeve online Booking.com. Në mesin e tyre janë edhe më shumë se 800 hotele nga Zvicra.
Sipas shoqatës zvicerane të hotelerisë, HotellerieSuisse, paditësit kërkojnë kompensim financiar për shkak të përdorimit shumëvjeçar të të ashtuquajturave klauzola të barazisë së çmimeve, të cilat, sipas tyre, cenojnë konkurrencën e lirë.
Në një njoftim të publikuar të dielën, HotellerieSuisse bëri të ditur se në këtë padi janë përfshirë gjithsej 18.135 hotele, prej të cilave mbi 800 janë nga Zvicra.
Numri i paditësve është rritur ndjeshëm që nga paraqitja fillestare e padisë, në fund të janarit. Në atë kohë, fondacioni holandez “Hotel Claims Alliance”, i krijuar për të organizuar këtë iniciativë, kishte njoftuar se 3.087 hotele i ishin bashkuar padisë së paraqitur në Gjykatën e Qarkut në Amsterdam.
Sipas fondacionit, vlera e mundshme e dëmshpërblimit arrin në disa miliardë euro, duke përfshirë edhe interesin. Lista e subjekteve paditëse tashmë është përmbyllur.
Në kundërshtim me konkurrencën e lirë
Padia lidhet me përdorimin për vite me radhë nga Booking.com të klauzolave të barazisë, të cilat i detyronin hotelet të mos ofronin dhoma me çmime më të ulëta apo me kushte më të favorshme në platforma të tjera të rezervimit ose në faqet e tyre zyrtare, krahasuar me ofertat në Booking.com.
Këto praktika konsiderohen në kundërshtim me parimet e konkurrencës së lirë dhe që nga viti 2022 janë të ndaluara në Zvicër.
Sipas fondacionit “Hotel Claims Alliance”, seanca e parë gjyqësore pritet të mbahet gjatë vitit 2027.
Ndërkaq, Booking.com i kundërshton akuzat e ngritura ndaj saj.
