Kosovë: MPJD i bën thirrje mërgatës të shmangë kalimin nëpër Serbi

Ministria e Punëve të Jashtme dhe Diasporës (MPJD) ka bërë një thirrje urgjente për të gjithë qytetarët e Republikës së Kosovës që të shmangin kalimin përmes territorit të Serbisë, pas shtimit të rasteve të ndalimeve dhe arrestimeve arbitrare nga autoritetet serbe, transmeton albinfo.ch.

Në një deklaratë zyrtare, MPJD shpreh shqetësimin e thellë për praktikën e përsëritur të autoriteteve serbe ndaj qytetarëve kosovarë, duke e konsideruar atë si shkelje të rëndë të të drejtave të njeriut dhe të standardeve ndërkombëtare. Sipas Ministrisë, rasti i fundit që ngjalli reagim ishte ndalimi i ish-punonjësit të Policisë së Kosovës, z. Spahiu, në pikën kufitare ndërmjet Serbisë dhe Hungarisë.

“U bëjmë thirrje të gjithë qytetarëve të Republikës së Kosovës, përfshirë ata në mërgatë, që planifikojnë të udhëtojnë drejt vendit, të shmangin kalimin përmes pikëkalimeve kufitare me Serbinë,” thuhet në njoftimin e MPJD-së. Ministria i inkurajon qytetarët të përdorin rrugë alternative dhe pika të tjera kufitare për të garantuar sigurinë gjatë udhëtimeve të tyre.

MPJD njofton se është duke ndjekur me kujdes zhvillimet dhe mbetet në kontakt të vazhdueshëm me institucionet përkatëse dhe partnerët ndërkombëtarë, në përpjekje për të mbrojtur të drejtat dhe sigurinë e qytetarëve të Kosovës, transmeton albinfo.ch.