“U përmbys dynjaja?” Myslimani, me demokristianët në garë për Parlamentin e Zvicrës!

Tema e fenomenit më të ri, atij të “pushtimit” të garës elektorale për Parlamentin Nacional nga secondot shqiptarë po vazhdon të preokupojë mediet zvicerane. Gazeta “Grenchner Tagblatt” së fundi i ka kushtuar një artikull Shpëtim Xhemailit, të riut 25 vjeçar me prejardhje nga Maqedonia, emri i të cilit gjendet në listën zgjedhore të të rinjve të Partisë Demokristiane të Zvicrës (CVP) në Solothurn.

“Xhemaili dhe Rexhepi: dy mbiemra që më shumë të përkujtojnë listën e kombëtares zvicerane të futbollit se sa listën elektorale të të rinjve të CVP-së për Parlamentin Nacional. Por, me këtë rast është pikërisht e dyta: 25 vjeçi Shpëtim Xhemaili nga Trimbach-u i Oltenit dhe 22 vjeçja Herolinda Rexhepi nga Bellach-u ia kanë mësyrë Dhomës Nacionale të Parlamentit te Zvicrës duke përfaqësuar CVP-snë e Solothurnit. Të dy janë me prejardhje nga Ballkani.

Por, ndërkohë që Xhemaili e konsideron veten si mysliman, Herolinda është deklaruar si pa religjion.

Përkatësia fetare nuk përbën kurrfarë problemi në kandidaturën e tij për demokristianët, thotë Xhemaili. Madje është e kundërta: “CVP dhe religjioni janë dy gjëra të ndryshme. Unë jam politikisht aktiv dhe angazhohem për vlerat e CVP-së”. Dhe në fakt Xhemaili, duke i afishuar vlerat si fuqizimi i familjes, politika ambientale dhe sovraniteti i Zvicrës, ka vënë në fokus temat qendrore klasike të CVP-së, shkruan gazeta. “Kjo shkon edhe për një mysliman”, thotë ai.

Shpëtimi e adhuron ministren federale Doris Leuthard e cila është ndër personalitetet më të rëndësishme që CVP i ka dhënë politikës zvicerane. Ai e prezanton me mburrje fotografinë në të cilën ka dalë me të.

Me këtë pajtohet edhe deputeti nacional i kësaj partie Pirmin Bischof. Ai thotë se në listat zgjedhore partia ka edhe persona jo të krishterë, para së gjithash njerëz nga ish Jugosllavia, të cilët janë integruar në mënyrë të shkëlqyeshme në Zvicër. Kjo tregon se CVP po punon me sukses për integrim”.

Edhe më interesant është reagimi i njërit nder deputetët nacionalë më kritike ndaj islamit, “babait” të iniciativës për ndalimin e minareve, Walter Wobmann nga SVP-ja. Atë nuk e pengon aspak që myslimanët të kandidojnë për deputet nacional.

“Secili që hyn në garën zgjedhore duhet, thjesht t`i përmbahet kushtetutës sonë, ligjeve tona dhe në përgjithësi të ketë qëndrim të mirë ndaj vendit tonë. Ndërsa kufiri ku përfundon kjo e drejtë është kur dikush përfaqëson një të drejtë ekstremiste të huaj që nuk ka çfarë të kërkojë te ne”.