Përleshje mes policisë dhe protestuesve pro-palestinezë në Lozanë

Dje në qytetin e Lozanës u zhvilluan dy marshime të ndara me tematikë të ndjeshme politike: njëri në mbështetje të Palestinës dhe tjetri në solidaritet me Izraelin dhe kundër antisemitizmit, përcjell albinfo.ch.

Marshimi pro-palestinez përfundoi me tensione të larta dhe përleshje midis pjesëmarrësve dhe forcave të rendit. Pamjet nga vendngjarja tregojnë policinë zvicerane të trazirave duke përdorur ujë me presion për të shpërndarë turmën.

Përballja ndodhi përpara se protesta të shpërndahej plotësisht. Nuk është raportuar ende për të lënduar ose për arrestime, ndërsa autoritetet nuk kanë dhënë një deklaratë të detajuar mbi incidentin.

Ngjarja nxjerr në pah ndasitë e thella që ekzistojnë edhe në shoqëritë e qeta si ajo zvicerane, në lidhje me konfliktin izraelito-palestinez dhe mënyrën se si ato pasqyrohen në hapësirat publike.