MeteoSwiss ka lëshuar alarm të nivelit 3 për rajonin Jura të Vaud-it, ku priten 60 deri në 80 milimetra reshje. Ndërkohë, reshjet e reja të borës në zonat malore kanë rritur rrezikun nga ortekët, veçanërisht në Alpet e Valais-it.
Moti në Zvicër do të jetë i paqëndrueshëm gjatë së dielës, me reshje shiu në disa rajone të vendit. Reshjet më intensive pritet të përfshijnë rajonin Jura të Vaud-it, ku MeteoSwiss ka lëshuar paralajmërim për rrezik të nivelit 3.
Në këtë zonë parashikohet të bien lokalisht nga 60 deri në 80 milimetra shi.
Sipas Fabien Honsberger, përgjegjës i shërbimit meteorologjik në RTS, këto sasi të reshjeve përbëjnë shqetësim, pasi një vëllim i tillë uji brenda më pak se 24 orësh mund të shkaktojë grumbullime të konsiderueshme. Sipas tij, toka duhet të jetë në gjendje të thithë këtë sasi uji, ndërsa lumenjtë duhet ta përballojnë dhe ta largojnë atë në kohë.
Intensiteti i reshjeve shpjegohet me depërtimin e një mase ajrore të lagësht nga perëndimi, e cila po përforcohet nga një front i ftohtë që vjen nga veriu.
Reshje të dendura bore dhe rrezik nga ortekët
Ndërkohë, në zonat malore të Zvicrës, gjatë ditëve të fundit janë regjistruar reshje të konsiderueshme bore. Në Verbier janë grumbulluar sasi të mëdha të borës së re, duke rritur rrezikun nga ortekët në disa zona në nivelin 3.
Më të prekura janë Alpet e Valais-it, veçanërisht rajoni i Dents du Midi.
Paralajmërime janë lëshuar edhe për Alpet Veriore dhe zonat Prealpine, përfshirë rajonet që shtrihen drejt pjesës gjermanishtfolëse të Zvicrës. Deri të hënën në mbrëmje, në këto zona pritet të bien nga 60 deri në 80 centimetra borë e re.
Gjatë mëngjesit të së hënës, reshjet e borës mund të zbresin edhe në lartësi më të ulëta, pasi kufiri i borës pritet të bjerë deri në 800 metra mbi nivelin e detit.
Moti i keq përfshin edhe vende të tjera të Evropës
Kushtet e vështira atmosferike po prekin edhe vende të tjera evropiane. Në Francë, disa departamente janë vendosur në nivelin portokalli të alarmit për shkak të reshjeve të shiut dhe rrezikut nga përmbytjet, veçanërisht në rajonet Ain dhe Jura, pranë kufirit me Zvicrën.
Ndërkaq, në veri të Francës, rajoni Pas-de-Calais po përballet me përmbytje të mëdha.