Propozim i ri për taksimin e fluturimeve të shpeshta në Zvicër

Të Gjelbrit propozojnë taksë ajrore për udhëtarët e shpeshtë

Deputeti i Partisë së Gjelbër në Zvicër, Christophe Clivaz, ka paraqitur një propozim të ri në parlament, me synimin për të kufizuar udhëtimet ajrore të shpeshta dhe për të reduktuar ndikimin në mjedis. Ai ka propozuar një sistem taksimi progresiv për udhëtimet me avion, që favorizon udhëtarët e rrallë dhe penalizon ata që fluturojnë shpesh, përcjell albinfo.ch.

Sipas mocionit të tij, çdo banor zviceran do të përjashtohet nga taksa për fluturimin e parë që realizon gjatë vitit. Megjithatë, për çdo udhëtim pasues do të aplikohet një taksë që rritet në mënyrë progresive. Për më tepër, shuma e taksës do të varet edhe nga distanca e fluturimit dhe klasa e udhëtimit.

“Ky sistem synon të vendosë barrën më të madhe fiskale mbi udhëtarët e pasur dhe ata që udhëtojnë shpesh, jo mbi individët që fluturojnë vetëm herë pas here”, shpjegoi Clivaz.

Megjithatë, propozimi ka ngjallur kritika të forta, sidomos nga kampi konservator. Deputeti i Partisë Radikale-Liberale, Christian Wasserfallen, e quajti këtë nismë “një ide të çmendur, tipike për të Gjelbrit”, duke theksuar se kjo masë do të penalizojë vetëm qytetarët zviceranë, pasi nuk mund të zbatohet ndaj udhëtarëve ndërkombëtarë.

Debati për mocionin pritet të vazhdojë në parlament, duke rindezur diskutimin më të gjerë mbi rolin e politikave fiskale në luftën kundër ndryshimeve klimatike.

---