Ndihma ushqimore u reduktua për dhjetëra miliona amerikanë pas bllokimit të buxhetit

Administrata e Trump njoftoi të hënën se ndihma ushqimore për rreth 42 milionë amerikanë do të ulet në nëntor për shkak të bllokimit njëmujor të buxhetit.

Qeveria do të përdorë 4.65 miliardë dollarë nga një fond emergjent për të financuar pagesat e lidhura me programin SNAP, programi kryesor publik i ndihmës ushqimore në Shtetet e Bashkuara. Kjo do të mbulojë afërsisht “50% të ndihmës për familjet e përfshira,” sipas një zyrtari të Departamentit të Bujqësisë, siç është shprehur në dokumentet e gjykatës.

Ky njoftim vjen pas një vendimi të një gjyqtari federal në Providence (verilindje), një nga dy gjyqtarët që javën e kaluar urdhëruan degën ekzekutive të përdorte fondet emergjente për të garantuar vazhdimësinë e programit SNAP.

Trump gati të lëshojë ndihmën

Administrata e Trump pretendon se programi ka mbetur pa fonde pas një muaji “bllokimi,” ku demokratët dhe republikanët nuk arritën të bien dakord mbi një buxhet të ri, duke akuzuar njëri-tjetrin.

Presidenti Donald Trump siguroi të premten se ishte gati të lëshonte fondet e nevojshme nëse gjykatat do të vendosnin kështu, duke theksuar se “nuk dëshironte që amerikanët të vuajnë nga uria.”

Hakeem Jeffries, lideri i pakicës demokrate në Dhomën e Përfaqësuesve, akuzoi të dielën Donald Trump dhe Partinë Republikane për “shfrytëzimin e urisë” së 42 milionë përfituesve të këtij programi.