BDI dhe Ali Ahmeti përshëndesin marrëveshjen: Maqedonia më pranë NATO-s dhe BE-së

BDI rikujtoi se përmes ndërmjetësimin ndërkombëtar kishte arritur që brenda Marrëveshjes së 2 qershorit t’i fuste rekomandimet politike që i referohen marrëdhënieve ndëretnike

Kryetari i Bashkimit Demokratik për Integrim (BDI), Ali Ahmeti, pas arritjes së marrëveshjes ndërmjet liderëve kryesor të partive në Maqedoni, ka falënderuar komisionerin për Zgjerim të Bashkimit Evropian, Johannes Hahn, ambasadorët e BE-së dhe SHBA-ve në Shkup.
“Marrëveshja u arrit, falënderime për komisionerin Hahn, eurodeputetët dhe ambasadorët e BE-së dhe SHBA-ve në Maqedoni”, ka shkruar Ahmeti në profilin e tij në “Facebook”.

Po ashtu, gjatë ditës edhe zyra e shtypit e Bashkimit Demokratik për Integrim (BDI), përmes një komunikate e ka përshëndetur arritjen e marrëveshjes, duke vlerësuar se “nga kjo marrëveshje Maqedonia doli më e fortë, riktheu stabilitetin politik dhe u afrua edhe më pranë NATO-s dhe BE-së”.

“Bashkimi Demokratik për Integrim falënderon autoritetet e komunitetit ndërkombëtar për kontributin në arritjen e marrëveshjes përfundimtare dhe shpreh vlerësim edhe për rolin konstruktiv të liderëve partiakë në drejtim të tejkalimit të krizës së rëndë politike”, thuhet në komunikatën e BDI-së.

Në këtë komunikatë për shtyp, BDI rikujtoi edhe një herë se përmes ndërmjetësimin ndërkombëtar kishte arritur që brenda Marrëveshjes së 2 qershorit t’i fuste rekomandimet politike që i referohen marrëdhënieve ndëretnike, zbatimit te plotë të Marrëveshjes së Ohrit, marrëdhënieve ndërfqinjësore dhe integrimit euroatlantik.

Sipas BDI-së, këto rekomandime do të shtrohen për debat dhe për t’iu dhënë rrugëzgjidhje, gjatë proceseve në vazhdim, të cilat i parasheh marrëveshja e mbrëmshme e liderëve politikë të Maqedonisë.

Këto propozime përfshijnë: ndarje të tri posteve më të rëndësishme shtetërore me rotacion (President, Kryeminister, Kryeparlamentar), politikat gjuhësore, ndarja e drejtë e buxhetit, zhvillimi i barabartë rajonal, çështja e gjuhës, përfaqësimi i drejtë dhe adekuat, konsensualiteti, pajtimi, simbolet kombëtare, kanal televiziv shtetëror 24 orësh në gjuhën shqipe dhe masa të mirëbesimit dhe të risocializimit.

Ndryshe, pas bisedimeve maratonike me ndërmjetësimin e Komisionarit për Zgjerim të Bashkimit Evropian, Jonahes Hahn, në orët e para të së mërkurës në Shkup është arritur marrëveshja për dalje nga kriza politike në Maqedoni. Marrëveshja parasheh kthimin opozitës në parlament në shtator të këtij viti, largimin nga detyra e tij e kryeministrit Nikola Gruevski në fillim të vitit të ardhshëm dhe mbajtjen e zgjedhjeve të lira në muajin prill.