Deklarata e Kotzias-it në Prishtinë, tremb diplomacinë serbe

Deklarata e bërë nga ministri i Jashtëm grek në Prishtinë, Nikolas Kotzias, se Athina do të përkrahë vendin për anëtarësimin e Kosovës në UNESCO e Interpol, ka bërë që Beogradi të reagojë. Ministri i Jashtëm serb, Ivica Daçiq, ka thënë se Beogradi i ka bërë kërkesë Ministrisë së Jashtme të Greqisë që të qartësojë qëndrimet e ministrit Kotzias, transmeton gazeta “Blic”.

Daçiq tha se përkundër presioneve të shumta që po i bëhen Greqisë për ta ndërruar qëndrimin rreth njohjes së pavarësisë Kosovës, pret që ajo mos të e bëjë këtë.

Ndryshe, Ministri i Jashtëm i Kosovës, Hashim Thaçi, e priti të martën në Prishtinë kryediplomatin helen , Kotzias. Ai me këtë rast tha se Greqia nuk do të ndryshoj qëndrim për njohjen e Kosovës, por premtoi mbështetje për anëtarësim në Interpol dhe UNESKO si dhe hapjen e zyrës së Kosovës në Athinë.