15 mijë nënshkrime për përshpejtimin e liberalizimit të vizave

Aktiviteti ka nisur një javë më parë nga ana e shoqërisë civile, i prirë nga Fondacioni i Kosovës për Shoqëri të Hapur (KFOS).

Qytetarët kosovarë po i përgjigjen pozitivisht nënshkrimit të peticionit për përshpejtimin e liberalizimit e vizave, ka raportuar Kosovapress. Mbi 15 mijë nënshkrime janë mbledhur deri më tani nga organizatori vetëm në qendrat kryesore të Kosovës. Aktiviteti ka nisur një javë më parë nga ana e shoqërisë civile, i prirë nga Fondacioni i Kosovës për Shoqëri të Hapur (KFOS).

Nënshkrimeve iu bashkuan edhe 500 letra nga qytetarët drejtuar përfaqësuesit të Bashkimit Evropian në Kosovë, Samuel Zhbogar dhe ministrit kosovar për Integrim Evropiane, Bekim Çollaku, përmes të cilave qytetarët po shprehin nevojën e tyre për lirinë e lëvizjes.

Në 15 mijë nënshkrimet e numëruara deri tani, mungojnë ato të zonave më të thella, pasi që deri tani janë numëruar vetëm shtatë komunat kryesore.

Aktiviteti me nënshkrimet e qytetarëve fillimisht është paraparë të zgjasë deri më datën 28 të këtij muaji, por, sipas organizatorëve  varësisht prej rrjedhës së procesit, organizatorët mund edhe të vazhdojnë aktivitetin edhe për disa ditë të tjera.