Ndalojnë dëbimin e shqiptares duke bllokuar hyrjen e burgut

Rreth 50 veta me qëndrimin e tyre ulur para hyrjes së burgut për deportim në Büren kanë bllokuar kalimin me makinë për në ndërtesën e gjykatës

Dëbimi i një vajze 18 vjeçe në Shqipëri për momentin është pezulluar. Kjo ka ndodhur pas protestës së rreth 50 bashkëqytetarëve të saj gjermanë në Bielefeld. Njoftimin për anulimin (e përkohshëm) të dëbimit e ka bërë një zëdhënës i administratës së qytetit sot paradite.

Arsye për këtë pezullim, sipas tij, ka qenë raporti mjekësor nga klinika në të cilën është duke u trajtuar aktualisht nëna e shqiptares së re. Sipas këtij raporti, prania e vajzës është e domosdoshme pasi që ajp shërben edhe si përkthyese në mes të ekipit mjekësor dhe nënës saj të sëmurë. “Në bashkëbisedim me entin shëndetësor të qytetit e kemi pezulluar dëbimin”, ka deklaruar zëdhënësi për mediet gjermane, transmeton albinfo.ch.

Ndërkaq të martën më shumë se 50 veta nga “Arbeitskreis Asyl” i Bielefeldit kanë protestuar kundër dëbimit të shqiptares, shkruan westfallenblatt.de. Ata me qëndrimin e tyre ulur para hyrjes së burgut për deportim në Büren kanë bllokuar kalimin me makinë për në ndërtesën e gjykatës ku shqiptares do t`i kumtohej vendimi për lëshim të Gjermanisë, përcjell albinfo.ch.

Mbrëmjen e të mërkurës ata kane liruar hyrjen pasi kanë marrë garancinë nga autoritetet për të huaj se rasti do të rishqyrtohet. Por edhe sot rreth 50 veta kane protestuar kundër dëbimit.