Mbahet finalja e kuizit për nxënësit shqiptarë nga diaspora

Në garën finale do të marrin pjesë nxënës garues nga gjashtë shtete: Austria, Zvicra, Gjermania, Suedia, Greqia dhe Sllovenia

????????????????????????????????????

Në kuadër të manifestimit “Ditët e diasporës”, për të pestën herë me radhë Ministria e Diasporës organizon finalen e kuizit të diturisë “Ti je pjesë e Atdheut”, që do të mbahet të shtunën më 25 korrik 2015, në Shkollën Amerikane në Prishtinë, duke filluar në ora 17:00, ka njoftuar Ministria e Diasporës.

Përmes këtij kuizi, nxënësit e mësimit plotësues në diasporë do t’i tregojnë njohuritë e tyre nga fusha të ndryshme të dijes, sidomos njohuritë për identitetin shqiptar. Kjo garë po ashtu është në funksion të krijimit të lidhjeve mes fëmijëve nga diaspora dhe atyre nga Kosova, si dhe sensibilizimi i shoqërisë kosovare për përgjegjësinë dhe përkujdesjen për mërgatën.

Në garën finale do të marrin pjesë nxënës garues  nga gjashtë shtete: Austria, Zvicra, Gjermania, Suedia, Greqia  dhe Sllovenia.  Secili vend do të përfaqësohet me nga tre nxënës. Pjesëmarrësit e kësaj gare janë fitues të garave të mbajtura në shkollat shqipe të mësimit plotësues në diasporë.

Ndryshe, Ministria e Diasporës, për të pestin vit me radhë, e organizon dhe e mbështetë materialisht organizimin e kuizeve në vende të ndryshme të Evropës ku ka mësim plotësues në gjuhën shqipe, dhe e organizon në fund finalen në Prishtinë.